ភ្នំពេញ៖ តម្លៃប្រេងឥន្ទនៈនៅកម្ពុជាបានបង្ហាញសញ្ញាចុះថ្លៃបន្ទាប់ពីជាងពីរខែនៃការឡើងថ្លៃ ទោះជាយ៉ាងណាតម្លៃនេះនៅលើ៥ពាន់រៀលដដែល។ តម្លៃប្រេងសាំងធម្មតាដែលនឹងដាក់លក់ពីថ្ងៃទី១១ ខែកក្កដា រហូតដល់ថ្ងៃទី២០ ខែកក្កដា មានតម្លៃ ៥ ២៥០រៀល ខណៈតម្លៃប្រេងម៉ាស៊ូតមានតម្លៃ ៥ ៦០០រៀល។
បើពិនិត្យលើតម្លៃនេះគឺចុះមកស្មើតម្លៃកាលពីថ្ងៃទី១ ខែឧសភា ឆ្នាំ២០២២។
ក្រសួងពាណិជ្ជកម្មបញ្ជាក់ថា តម្លៃនេះគឺឡើងចុះទៅតាមប្រេងតាមទីផ្សារអន្តរជាតិមកគណនាតាមប្រកាសដូចមានក្នុងឯកសារយោងដែលបានដាក់ជូនប៉ុណ្ណោះ។
ការដាក់ទណ្ឌកម្មពីលោកខាងលិចលើប្រទេសរុស្ស៊ីដែលជាអ្នកនាំចេញប្រេងធំមួយបន្ទាប់ពីមានការឈ្លានពានលើអ៊ុយក្រែនបានបង្កើតជាបន្ទុកជាច្រើនដល់ប្រទេសនានាលើពិភពលោកដែលបណ្ដាលមកពីបញ្ហាប្រេងសាំងឡើងថ្លៃ។ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន តែប្រកាសជារឿយៗថា «ទណ្ឌកម្មមិនមែនជាដំណោះស្រាយនោះទេ វាមានតែការខាតបង់ទាំងអស់គ្នារួមទាំងអ្នកមិនដឹងអីផងដែរ»៕
